ائی پرچه‌م-ی-ایسلام نه سۆرعه‌تله اسیرسن؟
عبــاس دۆشــۆر توْپــراغــا سنــده تلــه‌سیرسـن
اوْلمــا گـۆل-ی-اۇمێــدێمــی ســن پرپر ائدیرسـن
قـوْلسـۇز گؤرۆب عباسی بئلـه لنگـه‌ر ائدیـرسـن
ـــــــــــــــــــــــــــــــــــــــــــــــــــــــــــــــــــــــــ
چوْخ زحمه‌تیوی چکدی عموم جعفر-ی-طیار
جان قوْیدۇ بابام شیر-ی-خۇدا حیدر-ی-کرار
راضی دگیله‌م منده سنی خوار ائده اشرار
سـن دینیـمیزیـن پرچـه‌میـسـه‌ن یاتماغــا اسمـه
السیز باشێم اۆسته‌ن یێخێلێب سایه‌وی کسمه
من گؤزله‌ییره‌م قانلێ گؤزۆم تک سنی الان
فیکـریم بـۇدۇ سـن اوْلمایاسان قانێـلا الـوان
گؤرسه سنی قان آغلامایا عیتره‌ت-ی-سولطان
مومکوندو ائده‌ن وقته باجێم عزم-ی-مدینه
سـوْغات آپارا بیکه‌س آنـام اۇمـم-ی-بنینـه
ال گئتدی بۇ گؤزله‌رده‌کی القانـێ سیلینجـه
من وئرمه‌دیم الده‌ن سنی الـلـه‌ر کسیلینجه
ائیکاش حۆسئینیم گله شام اهلـی گلینجـه
ایظهـار-ی-ریضایـه‌ت ائـده عالـی روئشیمـده‌ن
تحویل آلا اؤز وئردیگی شمشیری دیشیمده‌ن
شه گلمـه‌سه بیگانه منیم حالێمێ بیلمـه‌ز
قانێلا دوْلان گؤزله‌ریمی اؤزگه‌سی سیلمه‌ز
دۆشمه‌نله‌ریمه باشێم عمـود آلتدا اگیلمـه‌ز
سن اگمه منی قـوْی دایانێـم اؤز سـؤزۆم اۆستـه
دین پرچه‌می‌سن دۆشمه یئره قال گؤزۆم اۆسته
قوْی سسله‌ییم الان شه-ی-عاله‌م اؤزۆ گلسیـن
عئشقیم، هوه‌سیم، روحیم علاقه‌م اؤزۆ گلسین
صبر ائیله بیر آز صاحیـب-ی-پرچـه‌م اؤزۆ گلسیـن
یاتمـا منـی سێنـدێرمـا بـۇ دۆشمه‌ن قاباغێندا
قوْی گلسین حۆسئینیم یێخێلێم من قاباغێندا [ایاغێندا]
مـأیـوس اوْلـۇب القیـصصـه الینــده‌ن عـلَمـینـده‌ن
سێندێ اۆره‌گی اوْخ سیته‌مینده‌ن سۇ غمینده‌ن
گـؤردۆ الـی بوْش گئتمـه‌ک اۇزاق‌دێـر کره‌مینده‌ن
سسله‌ندی حۆسئین لوطف ائله السیز باشا باش چک
شاهێــم بؤیۆگـۆم گـل بـۇ کیچیـک قـارداشـا بـاش چـک
سققا قوْلۇ گر دۆشسه حره‌م ساخلایا بیلمه‌ز
اوْخ دگسه اگه‌ر مشگیده نم ساخـلایا بیلمـه‌ز
آخه‌ر بۇ کسیـک قوـْلـلار علـَم ساخلایا بیلمـه‌ز
لنگه‌ر ائله‌دی بئیده‌ق [بئیره‌ق] امان وئرمه‌دی تئز گل
قان دوْلدۇ حۆسئـن جـانـێ گـؤزۆم گؤرمـه‌دی تئـز گـل
حالێـم بـۇ سؤزۆمده‌ن سنه معلۇم اوْلۇ قارداش
گـزدی بـاشێم اۆستۆنده حریفین قوْلۇ قـارداش
قـانێـلا گـؤزۆم دوْلـدۇ ایتیــردیــم یوْلـۇ قــارداش
گؤز گؤرمه‌دی هئچ بیلمه‌دیم آخه‌ر هارا دۆشـدۆم
ال اوْلمــــادێ تیکیــه ائله‌دیـــم اوْخلارا دۆشـدۆم
