کربلایه گلدی چۆن پئیغه‌مبـه‌ر عاشـورا گۆنـۆ
گؤردۆ برپادێر اوْ چؤلده محشه‌ر عاشورا گۆنـۆ
گـؤردۆ بیر یاندان گلیر، "هل ناصر و ینصر" سسی
عرشه چێخمێش بیر طره‌فده‌ن، "هل من مبارز" نعره‌سی
بیر طره‌فده اؤلدۆرۆرله‌ر بیر غریب-وْ-بیکه‌سی
جمع اوْلۇب یۆز مینده‌ن آرتۇخ، لئشگه‌ر عاشورا گۆنۆ
نئیزییه تیکیه قێلێب، بیر شخص بوْینۇندا کفه‌ن
یۆز دۇتۇب درگاه-ی-حقّه، کی خودای-ی-ذوالمنن
بۇ حۆسئن، بۇ کربلا، بۇ شئمر، بۇ نازیک بده‌ن
بۇ خده‌نگ-وْ-نیزه-وْ-بۇ خنجه‌ر، عاشورا گۆنۆ
اوْل بده‌ن کی بسله‌میشدی جان ایچینده مصطفی
گؤردۆ دۆشمۆش پاره-پاره قان ایچینده مصطفی
آشدێ باشێن آغلادێ، مئیدان ایچینده مصطفی
نالی‌یه گلدی تمامه‌ن گؤیله‌ر عاشورا گۆنۆ
کاش کی ویران اوْلئیدی بۇ سیپئهر-ی-بد ثوبات
آغلییاندا نعش دؤورینده سۇسۇزلێقدان بنات
آخدێ اشگ-ی-دیده‌ی-ی-زینب کیمی آب-ی-فرات
لبله‌رین امدی عطه‌شده‌ن، اصغر عاشورا گۆنۆ
مست ائدیب پیر-ی-موغان یئتمیش ایکی مستانه‌نی
مجلیس-ی-ذرّاتیده نوش ائتدیله‌ر پئیمانه‌نی
کربلاده گؤردیله‌ر چۆن طلعه‌ت-ی-جانانه‌نی
دۆشدۆله‌ر مدهوش -وْ-بیخود یئکسه‌ر عاشورا گۆنۆ
شاد ابوسئفیان اوْلۇب، قالدێ پئیغه‌مبه‌ر رنجیده
اوْینادێ بخت-ی-یزید-ی-بی‌حیا شئش پنجده
ماته دۆشدۆ شه پییاده، عرصه‌ی-ی-شطره‌نجده
فیلده‌ن سالدێ وزیری، اشقه‌ر عاشورا گۆنۆ
قێلدێ جیلوه لومعه‌ی-ی-نور-ی-خودا مئشکاتیده
اوْینادێ ریندان-ی-کؤهنه، تخته‌ی-ی-ذرّاتیده
طاس-ی-زرّین-ی-ویلایه‌ت قالدێ چرخ-ی-ماتیده
پنج-وْ-شئش‌ده‌ن خالی اوْلدۇ، شئشده‌ر عاشورا گۆنۆ
فارئغ اوْلدۇ شئمر-ی-لامذهب چو کار-ی-شاهیده‌ن
الده خنجه‌ر خئیمه‌گاهه، گلدی قتل‌گاهیده‌ن
نه پئیغه‌مبه‌رده‌ن ائتدی اوْل کافه‌ر عاشورا گۆنۆ
هر نه بیلدی ائیله‌دی اوْل کافه‌ر عاشورا گۆنۆ
وئردی فرمان ابن-ی-سعد-ی-بی‌مروّت لئشگه‌ره
ویردیلار اوْت خئیمه‌گاه-ی-عیتره‌ت-ی-پئیغه‌مبه‌ره
جمع اوْلۇب یئکسه‌ر زنان-ی-کوفه زیب-وْ-زیوه‌ره
قالدێ زهرا قێزلارێ آغلار گۆن عاشورا گۆنۆ
یاعلی قالدێ حۆسئن تک، نئینه‌وایه گلمه‌دون
چوْخ چاغێردێ گل بابا، اؤلدۆم هرایه گلمه‌دون
خئیبه‌ره گئتدون نده‌ن بس کربلایه گلمه‌دون
یا علی صوت ایله دوْلدۇ چؤللــه‌ر عاشورا گۆنۆ
ائی خلیله آته‌ش-ی-نمرودی گۆلزار ائیلییه‌ن
وادی-ی-ایمه‌نده موسائیله گوفتار ائیلییه‌ن
یوسیفی سولطان-ی-میصر، شمسی عطّار ائیلییه‌ن
بس نده‌ن قالدێ حۆسئن بی‌یاوه‌ر عاشورا گۆنۆ
