نجه قان آغلامسین داش بو گون
کسلوب یتمیش ایکی باش بوگون
***
توکولوب توپراقا باشسیز شهدا
کربلا دشتی اولوب کوه منا
مئج ایدر قانیله دریای بلا
نجه قان آغلامسین داش بوگون
***
بوهمان گوندی باتوب یاسه جهان
بویانوب قاه سوسوز پیر و جوان
انبیالر باش آچوب آغلوری قان
نجه قان آغلامسین داش بوگون
***
بو همان گوندی سولوب دین چمنی
سارالوب سرو و گل و یاسمنی
قطعه قطعه اولوب اکبر بدنی
نجه قان آغلامسین داش بوگون
***
ویردی لیلایه خبر شاه زمن
اکبرون گلدی گل ای کان محن
بیر عبانین دولوسی قانلو بدن
نجه قان آغلامسین داش بوگون
***
طوی دوتوب قاسمه شاهنشه دین
ایتدیلر بزم عزا حجله گهین
یاخدی قانیله حنا تازه گلین
نجه قان آغلامسین داش بوگون
***
نجه طوی ناله سماواته سالوب
ناله داماد آناسیندان اوجالوب
بدنی آتلار ایاقینده قالوب
نجه قان آغلامسین داش بوگون
***
حرمله آلدی اله تیر و کمان
اصغرین حلقین ایدوب تیره نشان
ایچدروب سو یرینه قرمزی قان
نجه قان آغلامسین داش بوگون
***
کسدی اشرار دنی سو یولونی
تشنه سقانون آلوب صاق صولنی
هم صاغین سالدیلار هم صول قولنی
نجه قان آغلامسین داش بوگون
***
