ای عئشق میناسینده وئره ن جان آتام اوغلو
گلدیم یارالی جانیوه قوربان آتام اوغلو
بو باشدی عمودیله سینیب دورموری قانی
بو قان آپاریبدیر سنی ائی حیدر ثانی
اؤلدوردوله تا سن کیمی بیر شیر ژیانی
قارداشیوه ده ال تاپار عدوان آتام اوغلو
سو مشکویوی قارداش کیم ائدیبدیر بئیله پاره
بو قاندی باشوندان آخیری بئیله عذاره
بو جیسمیدی شام اهلی ووروب بیر بئله یاره
گول پئیکرون ائیلیبدیله شان شان آتام اوغلو
یاده کسیلمیش قولو سالدیقجا یانار دل
بیلمیب بو الین حورمه تینی فرقه-ی-باطل
صد حئیف اولا رحم ائتمه دی بو اللره قاتل
قطع ائیله دی اول ناکس دوران آتام اوغلو
باخماییبدی عدو قابل-ی-حورمت دی بو اللر
دین پئیکرینه بیر ید-ی-قدرتدی بو اللر
محشر گونو اسباب شفاعت دی بو اللر
زهرانین الینده اولو عنوان آتام اوغلو
بو چؤلده سوسوزلوق اودو چوخ دیللری دلدی
از بس کی آغیر قیمته قارداش باشا گلدی
بیر مشک سویون قیمتی آیا ایکی الدی
اوستونده ده باش ایستیری دونان آتام اوغلو
ائی آرخام ائلیم عترتیمین یاوری قارداش
دور قویما کمک سیز من بی لئشکری قارداش
وئردین سویا ال وورماغا بو اللری قارداش
کیم سن تک ائدیب ترک-ی- سر و جان آتام اوغلو
ابوالفضل ع نوحه سی - غمناک
کتاب: منشور عاشورا جلد سوم – ص 206
دور ای سوسوز وئره ن جان، کوی وفاده قارداش
قولسوز دوشوب قالان بو بحر-ی-بلاده قارداش
گلدیم بو بحر غمدن جسمون چکه م کناره
غرق اولموسان گلینجه من ایله ییم نه چاره
گلمه ز الیم الوندان ایمدی دوتام دوباره
گؤرره م الون اولور بو دردیم زیاده قارداش
دریا کیمی تلاطم ائیلیب گروه-ی کافر
غرق ائتدی پاره جیسمون، سئیلاب –ی-تیغ و خنجر
دور ای شکسته کشتی دریاده سالما لنگر
طوفاندی گردباد-ی-غمدن هواده قارداش
سؤز یوخدی حق یولوندا سن اؤز اؤزون آتیبسان
طی-ی-مراحل ائیلیب سر منزیله چاتیبسان
اما منه چتیندی بو نوعیله یاتیبسان
سن سیز گلیبدی گؤگلوم فریاد و داده قارداش
چاره م آزالدی سن سیز سیندی سیندی بئلیم برادر
یاتدی علم پوزولدو اوردو داغیلدی لئشگر
یالقیز اؤزوم بو قدری دوشمن نه یار و یاور
یوخ بیر کسیم یئتیشسین بو چؤلده داده قارداش
